Saturday 18 December 2010

是不是這樣的甜品,我才會這樣的想寫文?

話說跟祁佳仕已經網交多年,難得前陣子因緣際會雙方找到藉口約出來碰個靚面,人再懶也好,自然亦要在部落格稍為公告一下才算得上正經事,經過首輪飯聚,次輪移師到對方事先不張揚的用餐地點油麻地得如酒樓,飽餐一頓,但心還有點缺,經商議,主要自己又想試,就到近廟街頭的貴花甜再續前緣。


甫進店,屁股才剛找到落腳點,店員就放低餐牌並開始向我們作出傾銷。

「睇兩位,應該都係第一次黎呢?」店員聲調抑揚頓挫,相當有勁。

「係啦係啦。」

「嗱,咁有樣甜品就一定要介紹比兩位試試喇。」他的聲調越聽越官腔。「橙酒火焰雪山雪糕,呢個真係勁。」

「...個甜品可以點勁呢?」我問,祁則細聽著。

「雪山用蛋白打成,內裏再包住雪糕,到上檯時再在面層淋上橙酒點火而成,而且雪糕,我地係用Dreyer's 雪糕的。」店員指著餐牌誇張地說,其語氣誇張之劇,大概就和我文章用詞的程度差不多。「我地呢個甜品得到由新城電台舉辦的明火食神爭霸戰的甜品金獎同創意大獎。」

「...明火食神爭霸戰?」火焰雪山不是一向都這樣制成的嗎?用上Dreyer's 又有甚麼值得刻意專題報導?明火食神爭霸戰到底是何月何日爆發的戰役?新城舉辦的這項戰事又是否和他們的勁爆頒獎禮一樣禮多人不怪?總之一堆又一堆謎團不斷在腦海湧現。

「係呀,甜品金獎呀,係甜品界的大獎黎架!」

「哈,大獎又真係勁喎。」我不自禁失笑起來,祁則持續望著餐牌仔細研究,就好像啟動了隔音裝置一樣。「等我地睇睇先。」

說畢,店員又再推介了兩三款甜品,最後笑著拋低「唔好怪我不停推介呀,我都係唔想你錯過呢款咁有特色的甜品咋」後才正式放低餐牌離去。

推銷沒罪,對方亦尚算有禮,反正我和祁除了心太軟想吃就沒甚麼頭緒,就決定要一客探探虛實。



等了十來分鐘,白色一堆的東西上檯,店員在表層淋上橙酒後點火,雪山由冒火到煙滅,為時相信不過三秒,至於味道,我不想寫食評,就不如用我和祁的一席話來作結吧。

大家一邊叉著跟前其貌不揚的雪山,一邊就聊將起來。

「呢味野就係參加左果個咩鬼食神戰。」我邊吃邊問。

「係啦。」祁在食物評價方面不太狠。

「重話拎左甜品金獎,都唔知個比賽有咩對手參加。」繼續吃,不代表喜歡吃,只是有衣食罷了。

「咪就係,都無聽過。」祁也在吃,我也相信她不會愛吃,因為吃這款甜品壓根兒就沒甚麼樂趣可言。

「都唔知個比賽係咪淨得兩組隊伍參加。」

「即係最低限度都有銀獎。」祁笑說。

「另外果隊重要係大良八記。」我也笑說

「咁唔怪得嬴到金獎。」

「唔止,重可能分左中式組同西式組。」

語畢,我倆皆哈哈大笑起來。

比利是朱古力心太軟加了地方名依樣強差人意,加點的士多啤梨冰亦用料不足啖出鳥來,前兩者同售四十多元,如斯喪心病狂的高價搭配嚴重名不符實的食物質素,除非罹患失憶症,否則沒可能再來。

3 comments:

said...

呢兩日少上網, 就算上都上微博, 竟然唔知你寫呢件事tim.
嗱, 我覺得你呢個笑話係真可以做我呢一年既年度最好笑的笑話既, 不過係要配合當時情境, 由你親口講先好笑.

said...

"祁則持續望著餐牌仔細研究,就好像啟動了隔音裝置一樣。"

--- 嘿~ 又俾你留意到我裝左呢個裝備. 我真係咁架, 可以直頭聽唔到人講野一樣.

said...

又係我呀~

講開又講, 因為細時冇大人肯點我想食既火焰雪山, 到大個左人人都食過哂所以亦都冇人陪我食, 所以我既第一次(食火焰雪山既)就咁就俾左你..同貴花甜了.
當時見到個火同我想像中有出入,到食完之後, 我心裏暗叫左一聲"乜原來火焰雪山係咁架咋?".

從此, 阿祁對火焰雪山的渴望隨着那三秒的火光一起熄滅了.