Thursday 26 August 2010

《公主嫁到》。


除了間中遇著無聊會收看《天天.天晴》,基本上已經很久沒認真坐定定看無記劇集,適逢近日悶悶地,不太想經常獨家村對著電腦看日劇,為跟家人多點溝通,就稍稍將注意力聚焦在新劇《公主嫁到》上,咁樣搞搞,勢估唔到又不錯看喎。

《公》劇一如宣傳廣告走胡鬧喜劇路線,本人行為舉措有些時候亦會顯得略為胡鬧,自然不會對該類片種有抗拒,就好像先前《秀才遇著兵》和《秀才愛上兵》,胡鬧得來對白有用心、演員又不顧儀態演得有喜感,可謂直擊要害看得我心花怒放,今次《公》劇繼承前兩者作風,在既定劇情內無無聊聊白白痴痴地搞笑一餐,還有滿有好感的陳豪和黃浩然,就更合脾胃了。

上述的好感,又並非單純只有好感那麼簡單,就好像陳豪,其實我對他有資格長期擔演男主角一直持有吹脹態度,無錯演技係尚可,但聽到其每到緊張關頭又或談情時那捏著喉頭拉長並強調尾音的唸對白習慣,人總會按捺不住哈哈爆笑了出來,所以我的好感,就只有喜歡他演喜劇那麼的多,這厚愛真箇是建立在薄弱地殼。

陳生演喜劇真的很有趣,他的語氣天生就很適合演胡鬧笑片,對白縱使不包含顯著笑點也好,只要經陳死人聲用接近走音的蠻力一呼,效果將得到額外加乘。其樣衰樣賤面容扭曲的訓身演繹方式對整件事亦產生了決定性作用,就好像講述眾駙馬在公主們面前勉強玩雜耍獻寶一段,陳豪衰聲加上麻甩拋鎚動作,抵死得差點沒直奔電視城上前打佢一身。

故事與笑點皆討喜,但個人就不甚喜歡《公》拍攝手法,拉鏡與跳鏡太多,效果沒被增強,還弄得人分神眼花,我明白現在很多新派電影都喜歡用這種導演手法,但,一集內用足百九幾次,點計都太多了吧?

講開又講,《公主嫁到》選在夏天推出實在令人費解,此劇不論題材場景以至背後團圓親情思想皆充斥濃厚農曆新年興味,在酷熱炎夏一邊吃著雪條一邊看著,真有點不知人間何世感覺,加上不巧在港殤夜作首播,由極悲忽爾跳線到極喜,實令人難以轉好頻度。

這種極端的荒謬事,只能寄望未來日子不會再發生了。

5 comments:

said...

發生了菲律賓慘劇無記也照播這套"公主駕到"其實都幾抵打.
不過撇開節目安排不當唔講, 公主駕到其實真係幾好笑. 除左嫲嫲同二娘唔夠喜感之外, 其他個個演員都有喜劇細胞, 呢套戲開正陳豪祥仔果範不在話,就連阿佘都幾得先好野, 自從絕代商嬌之後, 我其實最鍾意佢演呢類角色, 好過勾心鬥角果D啦.

袁健健 said...

今次我反而對佢照播公主駕到無咩意見,
咁橋撞正係喜劇唧~

阿佘確OK,基本上以同輩計,
我係最愛看阿佘...

見人少少先講你知,查實由嗲精開始,
我一直都鐘意阿佘的,
唔,講起都羞羞臉。

said...

就算人多多我都係咁話架喇, 我都係最鍾意阿佘, 就係貪佢夠嗲, 嗲得黎又唔會令人起哂雞皮果隻喎. 但你話同期 ? 佢出道早, 一時間我都想唔起邊個係同佢同期, 因為一早已被佢揮低哂lu.

至於後起既呢, 我都幾鍾意fala, 鍾嘉欣就嘛嘛地, 楊怡就真係no la, 胡杏兒被人彈得多, 越彈做得越差, 真係慘. 另外, 我其實都幾鍾意睇ck妹, 佢又係嗲嗲地果隻, 不過做極都做唔起吖, 真係可惜.

袁健健 said...

佢同期係咪應該郭羨妮果埋呀?
不過同齡又確實得返佢有D 睇頭。

法拉我好呀,但鐘嘉欣索爆的說,就更愛了,至於楊怡我係一見即轉台囉,胡杏以前我鐘意的,但自從肥完再瘦之後,就咩光彩都無哂了~我都鐘意CK妹又嗲又正,但好可惜真係只有嗲,加上黐住果條男人劇烈減分,加下開始老,無行的了。

講嗲的話,近月都係鐘意萬二蚊,把聲真係嗲到無得傾,酷愛呀

said...

萬二蚊我最鍾意佢o係做馬小玲時期咋, 果時後生d又大show長腿殺哂. 得閒炒飯見番佢, 已很有疲態喇.