奴性荷爾蒙過度活躍症。

過往每逢周六總會跟豬朋狗友出旺角來一記機局順便食飯聚聚，其例牌程度甚至達到無需電話核實到時到候一干人等自動自覺現身旺角Body Shop 地步，不過甚麼都會變，自從三年前陣中成員身邊相繼出現女朋友這種東西後，這項活動頓時縮減至一季才舉辦一次，到近兩年兼備上網功能的Xbox 360 大熱，機局還開始以一年一度形式進行，現在想起來，不能說不心酸。

上週六十點多，本人所需睡眠時間還沒到達預期三份一的時候，手提電話就響起過來。

「喂，重訓緊覺呀？」電話另一邊是前文提及過，以小男人聞名的好友B，亦是狗友間御用活動搞手。

「搞乜呀...放假流流十點幾打黎問人係咪訓緊覺，痴乜線...」擾我清夢只會出現兩個結果，一是極盡粗口之能事，一是醒後對談話內容全沒印象，就好像從沒聽過電話一樣。

「我以為你要返工嘛。」好友B 說。

「返你個頭咩，你要返工就唔好嘈住人陪你一齊返啦仆街。」人係清醒的，但雙眼依舊未能睜開，只能枕著電話軟攤在床對應著。

「哈哈～」真正的仆街就是被人直呼仆街仍然能夠處之泰然哈哈大笑。「今晚打唔打機？」

「下？今晚有局？」聽到是晚將會舉辦久違了將近半年的機局，精神為之一振。「Full Team？」

「係！」

「咁耐無局我以為你地死哂添～」我心感興奮，無限歡樂因很久沒見又很久沒打過機而起。「你唔駛陪女咩？」

「男人講野，女人聽野啦！」好友B 套用《黑馬王子》內張家輝名句狀甚得戚地說。

「嘩，振夫綱，好Man 唧。」

「其實係佢去左台灣公幹先有半日閒唧。」

「......」

男人。


起過身，梳洗一番換好衫，望望錶七點多就準備出發，狗友們約會一向都不會提及地點與時間，因為我們的老地方永遠都是八點左右旺角Body Shop 等，不過我總是遲到罷了。

八點十分到達目的地，現場一隻狗都看不到，原地等了沒多久，就收到好友B 來電。

「重未上黎？」好友B 劈頭第一句就問。

「你地到左？唔見你地喎。」我邊四處張問邊問。

「下？我地到左好耐喎。」

「我唔見喎，你地邊度等架！」我來回巡了兩圈都看不見半隻熟悉的人。「同一個地方搵極都唔見，《陰陽路》咩大佬。」

「我地玩住先，你等陣自己入黎。」好友B 這一句，令我恍然大悟。

「咪先！玩住先？你所謂機局唔會係屋企玩XBox 360 嘛？」

「梗係啦。」好友B 哈了兩聲，懶風騷地問。「喂，你唔係出左旺角咁戇呀？」

「係呀！！」我對著電話咆哮著。

「我要屋企等女友電話，點出得黎喎。」

「叫佢打手提咪出得黎玩囉聰明仔！！」這個「玩」其實不過就是打機而已，為甚麼要搞到咁複雜咁唔見得光呢？

「佢話手提驚收得唔清喎...」好友B 笑著答。

「咩都佢話，幾時到你話呀？」白行一趟加上對方尤如常寛上身的形象，我沒強烈爆粗已經算俾足面了。

「咁而家我咪話你聽囉！」

「......」

服了。