Monday 28 September 2009

《黃子華楝篤笑之嘩眾取寵》

一向甚為喜歡黃子華,但當上月底看完《黃子華楝篤笑之嘩眾取寵》後,有些事情再心痛都要講出口:

黃子華轉數比過往差了。

有現場看過子華楝篤笑都應該知道,除了每一場都會有人遲到之外,基本上每次開Show 每一晚都總有兩三枚口痕友入場踢館搏出位,所謂踢館,就是凡黃講了一兩個精警位又或Punch Line 的時候,口痕友都會在坐位處叫囂反駁之類,情況就好像睇鬼片時總會有神秘人故意在戲院內笑得很誇很大聲一樣,係十分喜歡以破壞別人作品來覓得自身存在價值的。

黃貴為楝篤笑始祖,相信開Show 前亦老早預備定適當應對,就好像上回看《越大鑊越快樂》時,黃就作出了一個個人認為很抵死很囂但又很有力叫對方收聲的應對。話說楝篤笑進行期間台下有觀眾不停的加把嘴反駁,人家始終真金白銀買飛入場,實在無必要令對方無癮地看楝篤笑,所以黃起初亦只少窒幾句又或聽而不聞算數,但人這回事就是這麼的賤,口痕友見好就唔曉收的不停繼續講,最後黃忍無可忍,彈出「家下D 人買飛睇Show 心態就係咁,比錢唔係想聽你講,係想人聽佢講,咁一係請呢位觀眾上台慢慢講」,現場起哄叫好,條口痕友即時摺埋收起沒再作過聲。

我今年沒有看過通勝才買飛捧場,睇Show 當日伊館場內自然不能免俗坐了三數枚類近的東西,亦一如以往,進行期間有著差不多的事情發生,而觀乎子華今次應對,沒過往的精警抵死,亦沒有足夠理據將對方擊退,事情演變下去,黃甚至予人一點發怒感覺,大家需知道,這情況就好像「認真就輸了」一樣,都是兵家大忌,所以場內口痕友聲勢並沒有得到遏止,亦令我對整個Show 打了點折扣。

去到中段子華有一個關於「可樂」的笑點,而這段黃好像有點錯漏誤將「可樂」代言人跟「百事」代言人調亂,大概就是「可樂」代言人為郭富城和謝霆鋒之類,而現場口痕友當然唔會錯過機會大聲聲討,老實說,我當時就認為這個反駁位很可能是子華經過計算度出來的陷阱,皆因黃一直以來只強調「可樂」,而眾所周知「可樂」是一種飲料類型,口痕友認為「可樂」等如「可口可樂」純粹出於其戇居而己,黃理應可以輕鬆甚至乎囂囂地以勝利者姿態回駁過去,誰不知事與願違,聽不到預想答案,反倒是一堆不太合理的理據,很顯然,黃在這個笑點上真的出了錯漏,而且還要是不能成功挽回敗局,這在黃子華楝篤笑歷史上就真的十分罕見了。

除去上述挑骨頭式失準,《嘩眾取寵》比起過往全盛期的雖然有所不及,但較前作《越大鑊越快樂》已經有了一個明顯調整和進步,而且,最重要係,《嘩眾取寵》內其中一個笑位竟然跟我很久前一篇文章《上車》內描述的事情相類似,我當然不會痴線得認為黃會來這裏看一大堆無謂文字,我只想說能夠跟子華撞觀點,己經足以令人開了三次心了。

10 comments:

Betty said...

可能人越成功越有钱, 就越禁不起别人的挑仞与批评.

袁健健 said...

我鐘意子華,所以我覺得唔會~

我睇果晚d 口痕友係特別瘋狂,
挑囂味道十分濃烈,真係幾令人難受的。

仕仔 said...

我超鍾意黃子華, 但很害怕看到他走下坡, 所以結果睇"絶代商嬌"算了, 至少電視冇臨場失準呢家野吖嘛, 咁樣佢係我心目中既印象唔會有變.

記得好幾年前, 我坐別人車駛到灣仔某酒店門口停左係度, 見到佢係度等的士, 我同黃對望左十秒, 大家都有點點笑意, 果個感覺都依家都仲記得.

袁健健 said...

仕仔:

我都超鐘意,所以上年or前年睇完《越大鑊越快樂》後,意志係消沉過好一陣子,因為真係幾差幾令人失望,最令我絕望係,佢竟然大玩改歌詞,點解要學林海峰???唉~~~家下諗起重嬲緊...

今年比上年好好多,有悶場,但可接受,不過始終不復當年勇~我個人認為係因為近年玩少左政治題材有關,始終子華玩政治係最拿手的~

有得睇就睇多d,差既都要睇,因為佢年紀唔細,條水食到差不多喇~

sukiwi said...

我觀看的場次,Dayo有對其中一個同以"可樂"一詞踩場的觀眾回應...其實有很多觀眾入場前就看了網上的留言,挑剔內容,故意留難...每次要應付這些觀眾就動用了Dayo不少時間...較後的場次他就無可奈何的縮減部分內容以控制流程...我們都很欣賞Dayo的臨場反應,但更希望能原汁原味享受他準備多時的全部內容...有觀眾希望與Dayo互動,亦當應該尊重表演者及其他觀眾, 適可而止會是更精彩的點綴.

關於改編歌詞,如果有看[末世財神],[秋前算帳], [拾下拾下] 等Dayo較早(2000前林海峰好像根本沒有涉獵棟篤笑) 的棟篤笑演出,就知道Dayo很早就以舊歌賦新詞的形式作為其棟篤笑中的一部分...

其實不用真的不斷比較,Dayo 的棟篤笑有其一套存在的意義,真正強調的就是生活, 不只政治,更攸關自身價值, 處世的考量, 不為了給予結論, 而是更在乎有沒有引起反思...我也是從他第三個棟篤笑開始看...越看越有味...

袁健健 said...

sukiwi

嗚哇~
真心多謝閣下詳盡留言~
還要是撐子華的,更高興~

我贊成互動,但個人認為互動動機不應沿自挑戰心態,而我入場那場次的觀眾態度實在可以用窮兇極惡來形容,係不停無盡的挑囂,單單頭一個反駁位,子華就用上五來分鐘去應付,很離譜,係我捧場以來看過最過份的一場。

少量改歌詞點綴我係接受,但不知是否錯覺,《越》真係改得特別多~那就不太合我口味了。

閣下論點很充份,作為子華fans,一定照單全收,總之未來日子好好醜醜也會繼續捧場~

另外,都多謝你捧場,嘻~

sukiwi said...

潤滑KY:

還好你不介意我多言, 主要是完show有一段日子,一看見還有有心人為Dayo的棟篤笑提出意見,有點忍不住將之前的感受回味一番...我相信Dayo是有真材實學的,讓我們一同期待來年的棟篤笑回更精彩...

Anonymous said...

可能真系鐘意黃子華鐘意到盲左!
講真, 我真系唔覺佢有反應慢! 呢D, 真系要睇幾場, 先至知道系咪真系慢左! 你講果場我都有睇! 講真...我唔覺, 佢真系亂左, 佢亦大方甘承認, 冇問題...架....睇返其他場次, 佢大大甘整估左李國寶個仔, 我真系好想睇~ 好多野, 唔系一場半場可以睇得出既! 我真系唔覺得佢有想發嬲既感覺! 反而我有, 因為果場, 真系太多干擾~

袁健健 said...

無名氏:

感覺的事因人而異,
都沒差啦~

不過閣下用得太多感嘆號了,
看得不很舒服。

Anonymous said...

我也覺得今次的show是他歷來最差的一次,我提早離場了。內容空洞,笑位亦欠完整,成個show完全無結構,.. 都唔知自己聽緊乜。我一向都好支持佢,不過今次真係好失望。