Wednesday 1 April 2009

口水多過茶的阿呂。

番中環,放工後,以水路進攻紅磡再摌上火車站交收唔緊要,由六點半等到七點都唔緊要,但等極都人影無隻,就真的很頂氣了,不過無計,情況就好像叮噹需要技安搞事才能維持出場頻率、狂派需要博派制衡才有戲唱一樣,天下間就是要存在著這種人渣才能維持生態平衡。

懷著谷鬼氣的心情走到大酒店附近,想吃老許爽嫰螄蚶,但近排實在很莫,加上很討厭老許那種彷圖書館氣氛的用餐模式,就又敲響退堂鼓。跟友達盲摸摸的周圍撞,竟然撞到了位處偏僻而又好像有點眼熟的越南阿呂,見平平地,相請不如偶遇就推門試試。

案發現場裝修很簡陋,跟友達望望餐牌,感覺就好像回到過去一樣,很多小食都是十元八塊就有交易,既然剛剛谷了一肚氣,就胡亂點了一大堆將怨氣發洩在口腹之慾上。

我真人不算太多話,但總算傾得兩嘴,而呢個阿呂,比韜韜更應該稱為韜韜,話語滔滔不絕水蛇春咁長,齋講的話還可當之為收音機怨男訴苦節目,但最慘佢不停講之餘還會久不久出題發問,即係你要答的,又要聽又要答,彷彿回到學生時期的Listening Test 一樣,彷如隔世。


多得阿呂,連魚蛋都可以講一大餐。

「要五蚊魚蛋啦。」

「嗱,你食唔食得辣先?」

「麻麻,微辣得喇唔該。」

「咁唔食得真係微辣好喇,我地剩係辣都分五級,最勁果級叫無極辣,我開鋪十幾年都無人試過,第四級辣的麵就有四個人試過,個個食到依嘩鬼叫紅哂臉,我面前梗係扮哂無野啦,食食下行左出去依依呀呀抖哂大氣咁,最尾咪又係飲唔到D 湯,哈哈哈哈。」

一款十幾年都沒人試過的辣究竟重有冇存貨,真的有點好奇,但自己確實唔食得辣,就無謂踢館了。

好的魚蛋話難唔難,但坊間出現難食的機率又真係算不上低,發到老蓮咁大的、煮到淋滋滋的、魚蛋上油多過上湯汁的,都很得我噁心,而阿呂的,保留彈牙、味道良好,咁囉,都係魚蛋,不過淋面那些阿呂引以為傲的帶粒醬汁又確實幾惹味。

「好唔好食呀?」

「好~好~」

「對面鋪個後生女有時走過黎買一百蚊走架。」

五蚊有八粒,一百蚊就有百六粒,難道對面鋪有兼營波波池生意嗎?


「點呀,蘿蔔好唔好食呀?」

「呢個好喎,無渣好清甜。」

「梗係啦,出面好多都係用清水烚煮,我地用上湯煨足時間的,又入味又夠淋,好正架。」

一點都不假,蘿蔔確實係又清甜又無渣又夠淋,我呢類蘿蔔狂徙試了半舊後,就按捺不住一舊接一舊啪入口了。

灼菜拼蘿蔔,售$5,香港跟祖國物價一體化了。


「蝦餅要細丫唔該。」

「我地蝦餅好野黎架,你睇下,前排先有週刊訪問。」

看著阿呂揚出來的過膠週刊報導。

「我地蝦餅唔同出面果D 架,出面果D 用普通蝦膠整,我地的蔗蝦同蝦餅都係用越南大頭蝦打成,唔同架,爽口彈牙好多。」

蝦味鮮甜,感覺天然不是硬膠之物,但至於爽口與否就值得商榷,起碼我放入口的幾舊質感都較散不算太爽口,感覺上就是撻搓時間唔夠,但除去口感的話,呢味野仍然係值得追捧,始終香口野,好難輸的。

咁有背景的蝦餅才$18 一大塊,食其口述歷史都抵。


「唔該,春卷要四條。」

「好。」

今次竟然無野講。

個人對此類網紙春卷要求不高,求求其其唔係油淋淋的話已經可以順利過關了,這裏的,不經油炸一叫即能上枱,老實,齋計其賣相確實令人卻步,白雪雪的四碌死氣沉沉望落無甚生氣,夾著吃的生菜又呈啞色狀沒了靈氣,可謂生靈塗炭,懷著弔喪心情噬春卷,竟然卜卜脆的,再夾生菜加點金不換,味道幾可級昇值,其中的金不換絕對居功自為,入口香氣四溢,再平淡的食材都被迫得出層次出來,吃著吃著,後尾又再追加了兩碌,食唔停口。

$14 四碌越式春卷,又係平得發笑。


「果個餐要生牛河,飲青檸梳打。」

「好。」

嗟,魚蛋果類雜食就多多事實,因乜解究來到生牛河、春卷之類就靜過鬼?阿呂真情緒化。

一個$20 還要連一杯青檸梳打的生牛河,你還會就對它抱著甚麼不切實際的期望嗎?有些人很介意生牛河不是真生牛,我亦然,但都係四字真言:睇餸食飯,廿餘元貨仔的還要生肉另上甚麼的多多要求,真執著。不生牛份量少少三餘片的散落在湯河上,很凋零;呻淡湯,屬蘿蔔式甜湯類,合我河車,再將浮面金不換左壓右擠,味道又變得更具層次、更合我河車了;每碗河類皆附贈一顆蘿蔔,跟前述的一樣清甜無渣,回想先前阿呂說蘿蔔是用上湯煨的,其實就是一石二鳥之計,但無相干,最緊要好吃。

席間阿呂傾得性起又奉上少量自家製XO 醬出來順便銷一下,內含蝦乾、元貝、金華火腿之類,好掂,下飯妙品也,但奈何味道跟我老媽自家製的有九成相似,著實無理由買樽一模一樣的返歸跟老媽出品打對台的,加上自己堅莫,慳番。

埋單總計$104,試了很多聽了很多吃了很多,滿足哂三個願望,谷鬼住的氣都消了。

名稱:越南阿呂
地址:紅磡寶其利街12A與黃埔街42A交界

No comments: