Thursday 12 February 2009

年年歲歲快快樂樂,乘兩倍所以講兩遍。

反正寫開生日飯,就順便為數個月前自己的生日飯埋個單、結個尾,入土為安。

十月某日,正值大壽之時,自己一向有跟友達慶生日,所謂禮尚往來,友達縱然千萬個不願意也好,亦要自動波的為我安排打點一下,否則的話,你一呎我一丈,下年花園扒王見。是晚選址赤柱,先先為我廿半多一野的壽辰來一個考驗,所謂考驗,就是由銅記到赤柱的一段路程,事關我係唔係幾搭得車的。

路直路彎一段路,就來到赤柱,自己對上一次來赤柱己經四數年前,想當年一來一回暈了兩野車浪,今次落車後行得走得又食得,感覺良好。友達打算懶神秘的帶我到餐廳,但礙於路痴一名,無法子,又係我帶路。

目的地 The Boathouse,其實老早知道晚膳地點在赤柱時已經有點預感,但交往之事貴乎呃呃玩玩,沒穿橋保留一點假天真,雙方開心一點,遊戲玩得過癮一點,又何用懼怕自己會否忘了怎樣去區分呢?友達選了二樓近窗位置,感覺當然寫意有氣氛,但氣氛歸氣氛,太黑就是太黑,現場燈火微弱伸手僅見五指,自己有老花又全店洋人待應,深感讀寫障礙之苦。

餐牌簡簡單單一頁清袋,少選擇反倒易選擇,點了幾款正正經經穩陣菜式,見大壽,又點了生啤酒類助慶一下,坐著飲著聊著,很快有得吃。

Hoegaaden 真的不太合口味,有得揀的話,還是Stella 好一點。

望望四野見枱枱梗有一筒藍貝在左近,感覺撚手,加上自己一向乃貝類物、尤其藍貝的忠實擁護者,如斯環境,有咩可能唔試試?就要了一筒小的忌廉白酒汁煮藍貝來探探虛實。

先啜淨藍貝殼上點點白汁,忌廉味濃郁又滑溜,加上藍貝的額外加乘,味道好得不得了,跟伙伴都是白汁教狂熱份子,單單呢兜白汁,已經足夠伴上一整條生命麵包了;全心全意啜汁,竟然忽略了主角藍貝,藍貝生性嬌嬌嫡嫡,憐香惜玉地將之緩緩挑出,入口先一陣忌廉香味,咬下則散發出藍貝獨有濃烈鮮味,濃郁忌廉味撞上濃鮮藍貝味,雙濃會,又竟能和諧共處,邊吃邊後悔最初捨大擇小的決定。

隨筒附送麵包一片,將之沾汁吃,好吃得停不了口。

先吃了餐前麵包,又吃了隨筒附送的包,見包猶未盡又成筒忌廉汁狀甚誘人,又再另叫一份特色麵包,全餐吃了一大堆包,嚴如麵包大會。

散叫的跟隨送的一片包品種一樣,但散叫的連著三款特色醬汁沾包,跟友達輪著香草醬、茄辣醬、燒烤醬和藍貝忌廉汁去吃,一碟數片的,轉眼間又消耗掉了,事實又證明,我們都是喜歡吃包的。

既然是藍貝.麵包大會,兩款主菜已經先後登場,其後的,就求求其其的快格跳過算數,而事實係,其餘叫的兩款不特別標青倒是真的。

向來喜歡沙律,尤其凱撒,越肥膩越重芝味的越深得我心,所以來這裏,亦慣性的點了一客。

沙律以大鐵兜上桌,排場十足,但吃落又是普通。幾兜野一客,菜蔬新鮮是例牌要求了,但芝士不足、切得唔夠一口一啖的,食凱撒沙律要動用刀叉去做切割手術,就略嫌不夠癮頭了。

原則上已經飽了,但一餐不吃過傳統式主菜總覺得欠缺了點飽暖,就要了西蘭花大蝦炒扁意粉來作個結。

尋常的賣相,吃一口,老實說是失望了,意粉Al Dente 屬此等餐廳最基本要求,這裏當然做得到,但味道偏淡吃落不甚夠味,對於我們這類濃味人仕來說,欠缺了一種叫人追著吃的衝動,慶幸大蝦量多又新鮮,咬落爽身味鮮,總算沒予人渣流灘之感。

埋單多少忘記了,但下次再來的話,必定一人一客藍貝再另加特色麵包,吃個痛快過癮。

名稱:The Boathouse
地址:赤柱赤柱大街86-88號

2 comments:

KennyT said...

你寫野好好笑好好睇

袁健健 said...

真開心~
謝謝~