Saturday 13 October 2007

《紙巾》。


要嚴選香港藝人中最似心理不平衡、最似變態猥瑣佬的話,個人心水必選變態之父單立文,放低Band 友身段的單生披著一頭長髮出演無記刑偵類劇集演變態佬演得入型入格,後來者馬德鐘吳毅將雖云同樣入目三分,但論氣質神韻始終相差三數皮,單生輕易成為變態佬香港區代表,但假若將選舉擴充至亞太區,我想在《紙巾》中演變態哥哥的村田充必定有足夠鐵票跟單生來一個中日大戰,爭一日長短。

《紙巾》作為東洋深宵劇場,尺度自然比尋常偶像劇寬鬆得多,故事講述女主角千麻的母親再緍嫁予教授,順理成章,兩母女緍後遷入跟同樣育有一子的繼父共同生活,但任職獸醫的哥哥外表正正經經年青有為,實則衣官禽獸早早收藏著千麻大量私人物品如毛髮破衫之類打著千麻主意...

半粒鐘一集的深宵日劇最值得追看地方就是沒了一貫四十五分鐘一集的偶像劇缺點拖長來做兜兜轉轉,《紙巾》甫開波第一集就異常入肉引起追看興趣,其劇情之急促甚至令我懷疑此乃單元劇一集一故事,感覺比起大條道理纏腳布日劇好上十幾廿倍。

深宵劇集另一賣點就是每集總有一幕半幕露兩點鏡頭,今次這個重任,就落在演女主角好友みひろ身上,みひろ貴為紅紅地的AV 女優,自不然有齊一貫AV 女優特質,樣靚腰細但身材算不上特別標青,比起同是AV 女優,演深宵露點劇而掦名的蒼井空可能有所不及,但相比起同劇女主角斎藤幸乃經已綽綽有餘、輕易勝出了,觀乎眾多深宵日劇後不難發現女配角比起女主角更搶鏡討好的現象經常性發生,選角準則實在古怪。

看畢《紙巾》,不得不服東洋人強勁的硬掘信念,故事諗到就做,完全置邏輯合理性於道外,可謂義無反顧,劇中講述變態哥哥拎住手術刀見人就殺的場口不少,一刀在身,定型槍一樣大人靚女一見即定唔曉反抗;又,女主角從大鬧市妓屋逃出後,鏡頭一轉就是荒廢野地,又係天下間一大神績,雖云睇戲唔好駁戲乃做人最基本德行,但導演解釋都懶得解釋的處事手法,跟很多東洋鬼片以信念行先一樣,又真係唔到你唔服。

《紙巾》乃改篇自專攻黑暗系的漫畫家阪邊周一的作品,《紙巾》原作沒看過,但阪邊另一變態作《人間失控》早幾個月前就追到最尾,感覺黑暗病態味十足,但漫畫去到中後段,就跟作品名稱一樣出現無以為繼、故事失控感覺,睇得多,不難發現要創作一個唔爛尾的故事,比起一個吸引人的靚仔開頭更加困難。

假若睇純情戇居系日劇睇得滯膩過度的話,《紙巾》會係清清味蕾換換感覺的好選擇。

8 comments:

Anonymous said...

呢...
原來呢....
我今年又記得wor.....
.
.
.
.
.
祝你生日快樂 !!

Anonymous said...

呢...
原來呢....
我痴左wor.....
.
.
.
.
.
我以為依家係23/10,
所以唯有係早左一日預祝你生日快樂啦 !! ^^"

袁健健 said...

哈哈~幾時都話你好,真係有我心~
連我自己都差d 唔記得,你竟然記得起~~
謝謝謝謝~~~

Anonymous said...

希望咁樣,一件健可以返來丫嘛..^^

袁健健 said...

我越懶人流越少,人流越少我又越懶,
我諗都幾難番到黎架喇~~
哈哈~~

Anonymous said...

我都好明白...我出走左半年,返黎之後人流都少左好多,搞到我都懶懶地...^^"

Anonymous said...
This comment has been removed by a blog administrator.
Anonymous said...
This comment has been removed by a blog administrator.