Thursday 15 March 2007

《華麗一族》。

木村拓哉的收視神話延續到《華麗一族》,終於被另一人氣日劇《花樣男子2》打破,後者此類抄作式偶像劇沒有興趣追看,但前者就由頭追到尾,越睇越好味。

尋常日劇總喜歡以一集一個故事又或一個段落作營運模式,兼且多屬小品經營,世界觀通常都不會去得太遠太偉大,但《華》劇則略有不同,故事著重於主角鐵平的奮鬥故事及跟父親之間的鬥爭,雖則不夠全面,但起碼不再獨孤一味情情塔塔悶到抽筋,感覺有點像無記數年前的《創世紀》,但當然,《創》劇角色複雜有戲味得多,講到緊張有張力更加勝出唔止一條街,拍大家族鬥爭片,始終港劇勝一籌。

《華》當初以巨大制作費、華麗佈景及強勁卡士作招倈,風頭一時無兩,但睇畢第一集,老實講,都幾悶幾令人失望,一來巨大制作費源於搭建大型佈景身上,實感一流,但談唔上甚麼華麗,始終一間爛鬼製綱工場,實在諗唔出可以華麗到甚麼地步,難道會鑲個金爐出來?可以,不過個爐會溶囉,二來第一集雖然長達個多鐘,但仍處於交代劇情的蘊釀期,感覺冗長摸不著邊際,相信亦係第一集後收視急跌主因,幸好去到第二集終煲出戲味來,值得追看。

雖聞卡士強勁,但對我來說,除了木村拓哉之外,其餘演員又並非想像中的厲害,起碼唔算獨當一面揹到飛。木村演戲真的好看,不論演普通打工仔、陰沉犯罪者、熱血青年又或才俊實業家,都別有一番格調,甚為得我歡心;女主角鈴木京香對其認識唔深,不過做傳統式狐狸精,又幾入形入格,雖然狐狸方式有別一貫傳統;襯托型女主角長谷川京子一向對其印象麻麻,今回演譯一個很易做的角色,印象依舊麻麻,記得年前木村曾公開表示不喜歡長谷川的,現在又合作拍劇,看來木村的霸道隨著流失中人氣慢慢消減掉了;飾演二子的相武紗季在先前《Attention Please》已經有點印象,今次再看感覺還不錯,角色原先打算由上戶彩擔演的,不過上戶嫌戲少太二打六推了,若然原企畫成事的話,卡士就真的比現在吸引得多;其餘還有一堆熟口熟面演員,當中有演鐵平的山本耕史,自從《同一屋簷下》演跛子後很少見到他演出,今次在《華》劇內髮型跟《同》時一模一樣,十年如一日認真長情專一,但現實私生活卻搞得一團糟。

劇集演到差不多完結,原以為最終高潮位會落在原先吹到大一大的宏觀理想,但勢估唔到迎來的卻係一場父子間的法庭戲,我先前提到的世界觀,原來就是這麼一回事。

No comments: